တရုတ်ပြည်မကြီးကလာပြီးတော့အမေရိကန်မှာဗူးပြန်သွတ်တဲ့ဖြည့်စွတ်စာဆေးတွေစားမိ၊သုံးမိရင်

မေးခွန်း(၁)ကတရုတ်ပြည်မကြီးကလာပြီးတော့အမေရိကန်မှာဗူးပြန်သွတ်တဲ့ဖြည့်စွတ်စာဆေးတွေစားမိ၊သုံးမိရင်ဘယ်လိုအဆိပ်အတောက်တွေ၊ဘယ်လိုအန္တရာယ်တွေဖြစ်လာနိုင်မလဲ၊ရေရှည်မှာဘယ်လိုရောဂါမျိုးတွေဖြစ်လာနိုင်မလဲဆိုပြီးတော့မြန်မာပြည်ကလူတချို့ကစိုးရိမ်တကြီးမေးနေကြတယ်။

—

မေးခွန်း(၂)က၊အရင်တုံးက(USA)ထင်ပြီးဝယ်ထားမိလိုက်တဲ့တရုတ်လုပ်ဆေးတွေကိုဆက်သောက်သင့်သလားမသောက်သင့်ဘူးလားလို့မေးနေကြပြန်တယ်။

—

အရင်းရှင်စနစ်ဆိုတော့အမေရိကန်ကနာမည်ကြီးကုမ္မဏီတော်တော်များများကအမြတ်တွေပိုကျန်ဖို့တရုတ်ပြည်ကဆေးတွေဝယ်ပြီး(USA)မှာဗူးပြန်သွတ်တာများပါတယ်။(CMAP)စီမက်ဆေးတွေလို့ခေါ်ရမှာပေါ့။စီမက်ဆိုတာ(China Made American Packaging)ကိုဆိုလိုတာပါ။

—

ဘူးပြန်သွတ်တယ်ဆိုတာကဥပမာ(Capsules)အမျိုးအစားဆေးတောင့်လေးတွေဆိုရင်(Capsules) အခွံအလွတ်လေးတွေနဲ့ပုလင်းဗူးခွံတွေကိုတရုတ်ပြည်ကမှာလိုက်ကြသလို၊ဆေးတောင့်လေးတွေထဲမှာထည့်ရောင်းဖို့ဆေးအမှုန့်တွေကိုလဲတရုတ်ပြည်ကပဲမှာလိုက်ကြပါတယ်။

—

ဒီရောက်တော့မှ(Capsules)ဆေးတောင့်သွတ်တဲ့စက်ကြီးတွေထဲကိုတဖက်ကဆေးတောင့်အခွံအလွတ်ကလေးတွေထည့်တဖက်ကဆေးမှုန့်ကလေးတွေထည့်ပေးလိုက်ပြီးဆေးတောင့်ထဲအမှု့န်ပြန်သွတ်ကြတာပါ။

—

အဲဒီလိုပြန်သွတ်လိုက်တဲ့ဆေးတောင့်တွေကိုပုလင်းထဲထည့်လိုက်ပြီးတော့(USA)လို့ရေးထားတဲ့တံဆိပ်ကပ်ရောင်းလိုက်ရင်(Made in USA) ဖြစ်သွားပါလေရော။

—

အတွင်းကဆေးမှုန့်၊ဆေးတောင့်အခွံအလွတ်လေးတွေနဲ့ပုလင်းခွံအလွတ်တွေအားလုံးတရုတ်ကလာပြီးတော့၊ USA မှာဆေးတောင့်ပြန်သွတ်တယ်၊ပုလင်းပြန်သွတ်ပြီးအပေါ်မှာလဲ(Made in USA) ဆိုတဲ့တံဆိပ်ကလေးကပ်ပေးလိုက်တယ်ဆိုတော့၊( Made in USA)ဆိုတဲ့အဓိပ္ပာယ်ကတော့(USA)မှာပုလင်းသွတ်တာကိုပြောတာနေမှာပေါ့။

—

(softgels)တွေ(tablets)တွေဆိုရင်တော့ဆေးလုံးအလုံးလိုက်လေးတွေနဲ့ဗူးခွံတွေကိုပါတရုတ် ပြည်ကနေမှာလိုက်ကြပြီးတော့၊ဒီရောက်တော့တရုတ်ပြည်ကလာတဲ့ပုလင်းတွေထဲကိုတရုတ်ပြည်ကလာတဲ့ဆေးလုံးလေးတွေကိုရေတွက်ထည့်လိုက်ပြီး၊အပြင်မှာ(Made in USA)ဆိုပြီးတော့တံဆိပ်ကလေးကပ်ရောင်းလိုက်တာပါပဲ။

—

Made in USA ဆိုတာပုလင်းပေါ်မှာကပ်ထားတဲ့တံဆိပ်ကိုပြောတာနေမှာပါ၊ပုလင်းရောဆေးရောကတေ့တရုတ်ပြည်ကလာတာဆိုပေမဲ့အပေါ်မှာကပ်ထားတဲ့တံဆိပ်ကတော့(USA)မှာပုံနှိပ်တာများပါတယ်။

—

ဒါနဲ့ပါတ်သက်ပြီးကျွန်တော်ကလေးဘဝတုံးကအကြောင်းလေးတခုသွားသတိရမိပါတယ်။ကျွန်တော့ဦးလေးရဲ့သူငယ်ချင်းတယောက်ကဟိုခေတ်(RTC)ခေါ်တဲ့ကုန်းလမ်းပို့ဆောင်ရေးမှာကုန်တင်တဲ့ဟီးနိုးကားကြီးတွေမောင်းတယ်။တနေ့ဟီးနိုးကားကြီးတစ်စီးနဲ့အိမ်ကိုရောက်လာတော့ကျွန်တော်လဲစပ်စုချင်တာနဲ့ကားပေါ်တက်ကစားတာပေါ့။

—

အဲဒီကား(Body)တစ်နေရာမှာကပ်ထားတဲ့ငွေရောင်သတ္တုပြားလေးတခုတွေ့တယ်။အဲဒီသတ္တုပြားမှာ(မြန်မာပြည်အကြီးစားစက်မှု့လုပ်ငန်းမှထုတ်လုပ်သည်)လို့ရေးထားတဲ့စာကျွန်တော်ဖတ်လိုက်ရတော့၊။ဟာငါတို့မြန်မာနိုင်ငံကတော်တော်တိုးတက်နေပြီပေါ့၊ဟီးနိုးကားကြီးတွေကိုတောင်ကိုယ်တိုင်ထုတ်လုပ်ပေးနိုင်နေပြီဆိုပြီးတော့ကိုယ့်တိုင်းပြည်ကိုအထင်ကြီးလို့မဆုံးဘူးဖြစ်သွားတယ်။

—

ဟုတ်တယ်လေ၊ဒါဂုဏ်ယူရမှာပေါ့အဲဒီအချိန်တုံးကကိုးရီးယားတို့၊တရုတ်တို့တောင်ကားတစ်စီးမှမထုတ်နိုင်သေးခင်မှာမြန်မာ့အကြီးစားစက်မ့ှုလက်မ့ှုလုပ်ငန်းကဟီးနိုးကားကြီးတွေစထုတ်နေပြီဆိုတာနည်းတဲ့တိုးတက်မှု့မှမဟုတ်တာ။ဒါနဲ့ဦးလေးသူငယ်ချင်းကိုမနေနိင်လို့ပြောလိုက်မိတယ်။ဦးလေးလို့၊ကျွန်တော်တို့နိုင်ငံကဒီလိုဟီးနိုးကားကြီးတွေကိုယ်တိုင်ထုတ်လုပ်နိုင်နေပြီဆိုတော့အရမ်းကိုတိုးတက်နေပြီပဲလို့။

—

အဲဒီကားမောင်းတဲ့ဦးလေးကြီးကကျွန်တော့်ကိုအူကြောင်ကြောင်နဲ့ပြန်ကြည့်ပြီးခေါင်းခါတယ်။မင်းကိုဘယ်သူကပြောလဲတဲ့။ဟီးနိုးကားဆိုတာဂျပန်နိုင်ငံကထုတ်တာကွတဲ့။ကျွန်တော်ကလဲအားကျမခံကားဘော်ဒီမှာကပ်ထားတဲ့သံပြားလေးမှာရေးထားတဲ့(မြန်မာပြည်အကြီးစားစက်မှုလုပ်ငန်းမှထုတ်လုပ်သည်)ဆိုတဲ့စာကိုခေါ်ပြီးပြလိုက်တာပေါ့။ ပြီးတော့ဦးလေးလို့၊ဒီမှာရေးထားတဲ့စာကမမှန်ဘူးလား၊လိမ်ညာပြီးရေးထားတာလားလို့မေးလိုက်တော့။

—

အဲဒီဦးလေးကဘာပြန်ပြောလဲဆိုတော့မလိမ်ညာထားပါဘူးတဲ့။သူတို့ရေးထားတာလဲအမှန်ပဲကွတဲ့။ကားတစ်စီးလုံးကတော့ဂျပန်မှာလုပ်တာပါတဲ့။ဒါပေမဲ့ဒီကားပေါ်မှာကပ်ထားတဲ့သတ္တုပြားလေးကတော့မြန့်မာ့အကြီးစားစက်မ့ှုလုပ်ငန်းကထုတ်လုပ်တာတဲ့။မှန်တာပဲလေသူတို့ကလဲကားအင်ဂျင်မှာရေးထားတာမှမဟုတ်တာ၊ဘော်ဒီမှာကတ်ထားတဲ့သံပြားမှာရေးထားတာပဲလေ၊မြန်မာပြည်မှာထုတ်လုပ်တယ်ဆိုတာကားကိုမဆိုလိုပါဘူးဆိုပြီးဒီသံပြားကိုပဲဆိုလိုတာပါလို့ဆိုရင်လဲသွားငြင်းလို့မှမရတာ။

—

အဲဒါကိုသွားသတိရမိတယ်။လောဘကြီးတဲ့အရင်းရှင်ဆေးကုမ္မဏီကြီးတွေရဲ့ဆေးတွေကလဲအတွင်းကဆေးလုံးတွေ၊အမှုန့်တွေကတော့တရုတ်ကမှာထားတာပေမဲ့၊ဗူး(USA)မှာပြန်သွတ်ပြီး၊အပေါ်မှာကပ်ထားတဲ့တံဆိပ်က(USA)မှာပုံနိပ်ထုတ်ယူတယ်ဆိုတော့သွားငြင်းလို့ဘယ်ရနိုင်မှာလဲ။

—

ဒီလိုဆိုတော့တရုတ်ပြည်မကြီးကလာပြီးတော့အမေရိကန်မှာပြန်ဗူးသွတ်တဲ့ဖြည့်စွတ်စာဆေး(CMAP)တွေစားမိ၊သုံးမိရင်ဘယ်လိုအဆိပ်အတောက်တွေ၊ဘယ်လိုအန္တရာယ်တွေဖြစ်လာနိုင်မလဲ၊ရေရှည်မှာဘယ်လိုရောဂါဆိုးကျိုးမျိုးတွေဖြစ်လာနိုင်မလဲဆိုတာမေးသင့်မေးထိုက်တဲ့မေးခွန်းတစ်ခုဖြစ်လာတော့တာပေါ့။

—

အဲဒီမေးခွန်းကိုဖြေဖို့ကျွန်တော်ကိုယ်တိုင်ကိုယ်တွေ့ကြုံခဲ့ရတဲ့တရုပ်ပြည်ကလာတဲ့အမေရိကန်မှာဗူးပြန်သွတ်တဲ့(CMAP)ဆေးတွေနဲ့ပါတ်သက်တဲ့ကိုယ်တွေ့အတွေ့အကြုံလေးကိုပြောပြမှရပါတော့မယ်။ကိုယ်တိုင်လက်တွေ့ကြုံခဲ့ရတာပါ၊သူများပြောလို့ပြန်ပြောပြနေတာမဟုတ်ပါဘူး။

—-

လွန်ခဲ့တဲ့အနစ်(၂၀)တုံးကကျွန်တော်အမေရိကန်နိုင်ငံ၊ကိုစရောက်လာပါတယ်။စရောက်လာစဆိုတော့ချက်ခြင်းကြီးကျောင်းပြန်မတက်နိ့ုင်သေးပါဘူး။။ကျောင်းတက်ဖို့ထက်ကိုယ့်ခြေထောက်ပေါ်ကိုယ်အရင်ရပ်တည်နိုင်အောင်ပိုက်ဆံရှာဖို့အလုပ်အရင်လုပ်ရတာပေါ့။

—

ကျွန်တော်နဲ့အတူတူလုပ်ဖော်ကိုင်ဖက်တွေထဲမှာပြည်ကြီးကလာတဲ့(တာကော)ဆိုတဲ့တရုတ်တယောက်လဲပါနေတာပေါ့။အဲဒီပြည်ကြီးကလာတဲ့တရုတ်ကဗမာစကားမတတ်သလိုကျွန်တော်ကလဲတရုတ်လိုမတတ်ပါဘူး။သူနဲ့ကျွန်တော်ကအင်္ဂလိပ်လိုပဲပြောဆိုဆက်ဆံကြရတာပါ။

—

သူ့တရုတ်နာမယ်အရင်းကတော့(တာကော)မဟုတ်ပါဘူး၊ခေါ်ရလဲခက်သလို၊ကိုယ်ကလဲခေါ်ကျင့်မရှိ၊ကြာကလဲကြာပြီဆိုတော့သိပ်မမှတ်မိတော့ပါဘူး။

—

ဒါကြောင့်သူ့ကိုတရုတ်လို(အကိုကြီး)ကိုဘယ်လိုခေါ်သလဲလို့မေးတော့၊သူက(တာကော)လို့ခေါ်တယ်လို့သင်ပေးပါတယ်။(တာကော)လို့ခေါ်ရတာကတော့ပိုပြီးတော့လွယ်တာပေါ့။ဒါကြောင့်သူ့နာမည်ကို(တာကော)လို့ပဲအလွယ်မှတ်ထားလိုက်ကြရအောင်ဗျာ။

—

ကျွန်တော်တု့ိတွေအလုပ်အတူတူလုပ်ကြပြီး နေ့လယ်ဖက်ကြတော့ထမင်းစားနားကြတယ်။ကျွန်တော်အရင်တုံးကထမင်းဆိုအများကြီးစားတာ၊အဲဒီတုံးကတည်းက(အင်ဆူလင်ခုခံမ့ှု)ရှိနေပုံရပါတယ်။နေ့လည်စာထမင်းစားပြီးရင်ထမင်းအဆီရစ်လို့၊အိပ်ငိုက်ပြီးအလုပ်ကိုကောင်းကောင်းမလုပ်နိုင်တော့ပဲလူကလေးလံထိုင်းမှိုင်းနေတော့တာပေါ့။

—

တာကောကြီးကတော့ထမင်းမစားခင်ရောထမင်းစပြီးမှာပါသွက်သွက်လက်လက်ပါပဲ။ကိုယ့်ထက်အသက်အများကြီးကြီးတဲ့လူကကို့်ထက်ပိုသွက်လက်နေတော့ထူးဆန်းနေတာပေါ့။

—

ကိုယ်လဲမနေနိုင်လို့သူ့ကိုမေးပြီးအကူအညီတောင်းရတယ်။ကျွန်တော်ကတော့ထမင်းစားပြီးတိုင်းလေးလံထိုင်းမှိုင်းငိုက်နေတယ်။ခင်ဗျားကြတော့သွက်လက်နေတာဘာကြောင့်လဲ။ကျွန်တော်လဲခင်ဗျားလိုသွက်လက်အောင်ဘာလုပ်သင့်သလဲလို့မေးလိုက်တော့၊တာကောကလဲမကွယ်မဝှက်ပဲအမှန်အတိုင်းပြောပြပါတယ်။နေ့လည်စာထမင်းစားတဲ့အခါမှာထမင်းမစားခင်သူသောက်တဲ့ဆေးဗူးလေးထုတ်ပြပါတယ်။

—

ဆေးကတရုတ်ပြည်ကလာတဲ့(ဂျင်ဆင်း)ဆေးပါ။(ဂျင်ဆင်း)ဆေးမြစ်တွေကိုအမုန့်လုပ်ပြီး(Capsule)သွတ်ထားတာပါ။တာကောကအဲဒီဆေးကိုတရုတ်ပြည်ကနေတိုက်ရိုက်မှာတာတော့မဟုတ်ပါဘူး။ထုံးစံအတိုင်းအမေရိကန်အရင်းရှင်ကုမ္မဏီတစ်ခုက၊တရုတ်ပြည်ကနေဂျင်ဆင်းအမှုန့်ကိုဝယ်ပြီးအမေရိကန်မှာဗူးပြန်သွတ်ထားတာပါ။(CMAP)စီမက်(China Made American Packaging)ဆေးတွေပါ။

—

ကျွန်တော်လဲညနေပိုင်းအလုပ်ကအပြန်သူပြောတဲ့( Super Market)တစ်ခုကနေအဲဒီဆေးပုလင်းလေးဝယ်လိုက်ပြီးတော့နောက်နေ့အလုပ်ဆင်းတော့ဆေးပုလင်းထည့်ယူလာတာပေါ့။အဲဒီနေ့ကတိုက်တိုက်ဆိုင်ဆိုင်၊တာကောကြီးအလုပ်နားတဲ့ရက်ဆိုတော့သူအလုပ်မဆင်းဘူးပေါ့။

—

ပုလင်းမှာအမေရိကန်ကုမ္မဏီကရေးထားတဲ့ဆေးညွန်းကိုဖတ်ကြည့်တော့ပုံမှန်အားဖြင့်တရက်တစ်လုံးသောက်ခိုင်းထားတယ်။အများဆုံးတစ်ရက်နှစ်လုံးထက်ပိုမသောက်ပါနဲ့အန္တရာယ်ရှိတယ်လို့ရေးထားပါတယ်။

—

ကျွန်တော်လဲထမင်းမစားခင်ဆေးတလုံးကောက်မြိုလိုက်တယ်။အဲဒီမှာတရုတ်ဆေးနဲ့စတွေ့တာပါပဲ။ဆေးသောက်ပြီးဘာမှမထူးခြားလာပါဘူး၊ခါတိုင်းလိုပါပဲ။ဒါနဲ့အများဆုံးတစ်ရက်နှစ်လုံးအထိသောက်လို့ရတယ်လို့ရေးထားတော့ကျွန်တော်လဲနောက်တလုံးကောက်မြိုလိုက်တာပေါ့။ဒါလဲဘာမှမထူးခြားပါဘူးခါတိုင်းလိုပဲလေးလံထိုင်းမှိုင်းပြီးငိုက်နေတာပါပဲ။

—

လူကနည်းနည်းတော့တင်းသွားတယ်။ဒီပြည်ကြီးသားပေါက်ဖော်ငါ့ကိုဂျင်းထည့်လိုက့်ပြီပေါ့။ နောက်နေ့တာကောအလုပ်လာဆင်းတော့နေ့လည်ထမင်းစားချိန်အထိတောင်မစောင့်နိုင်တော့ဘူး။ချက်ခြင်းကိုထမေးမိတော့တာပဲ။ခင်ဗျားလိမ်တယ်လို့၊ခင်ဗျားပြောတဲ့ဆေးကဘာမှမထူးခြားဘူးလို့ပြောလိုက်တော့၊တာကောကပြုံးတယ်၊သူပြုံးတော့ကိုယ်ကပိုတင်းသွားတယ်။ခင်ဗျားဘာလို့လှောင်ပြုံးပြုံးတာလဲ၊ကျွန်တော်အတည်ပြောနေတာလို့ပြောလိုက်တော့။

—

တာကောကရယ်ပြီးတော့ကျွန်တော့်ကိုပြန်မေးတယ်။မင်းဘယ်နှစ်လုံးသောက်တာလဲတဲ့၊ကျွန်တော်ကလဲဆေးညွန်းအတိုင်းပထမတစ်လုံးသောက်တယ်။နောက်တော့အများဆုံးတစ်ရက်နှစ်လုံးထက်မပိုစေနဲ့ဆိုတော့နောက်တလုံးထပ်သောက်တယ်ဘာမှမထူးဘူးဆိုတော့တာကောကအားရပါးရရယ်ပြန်ရော။ကျွန်တော်ကလဲဒီဘဲငါ့ကိုလှောင်နေတယ်လို့ထင်ပြီးထပ်တင်းသွားတာပေါ့။

—

တာကောကဆက်ပြောတယ်။မင်းသောက်တာနည်းလို့ဘာမှမထူးတာတဲ့၊တကယ်တော့တစ်ခါသောက်ရင်(၁၀)လုံးကနေ(၁၅)လုံးအထိသောက်ရမှာတဲ့၊မင်းကနှစ်လုံးပဲသောက်တော့ဘယ်ထူးခြားမှာလဲတဲ့။ကျွန်တော်ပိုတင်းသွားတယ်၊ဒီပြည်ကြီးတရုတ်ကတော့ငါကို(Overdose)ဖြစ်ပြီးသေအောင်လို့လုပ်ကြံနေပြီလို့ထင်သွားတယ်။ဆေးထုတ်တဲ့ကုမ္မဏီကတောင်နှစ်လုံးထက်ပိုသောက်ရင်အန္တရယ်ရှိပါတယ်လို့ရေးထားတာကိုခင်ဗျားက(10)လုံး(15)လုံးသောက်ခိုင်းတာဟာခင်ဗျာကျွန်တော့်ကိုသေကြောင်းကြံတာပဲလို့ပြောထည့်လိုက်တော့။

တာကောကပြန်ပြောတယ်။ငါ့ညီတဲ့၊မင်းကိုငါကဘာလို့အညိုးအတေးမရှိပဲနဲ့အလိုလိုနေရင်းနဲ့ လုပ်ဖော်ကိုင်ဖက်ခြင်းသေကြောင်းကြံရမှာလဲတဲ့၊ဒီဆေးကအမေရိကန်မှာထုတ်တယ်(Made in USA)ဆိုပေမဲ့၊အထဲက(ဂျင်ဆင်း)ကတရုတ်ပြည်ကြီးကလာတာတဲ့၊ငါ့အမျိုးတွေထဲကတချို့ကတရုတ်ပြည်မှာဆေးဝါးတွေထုတ်လုပ်နေတာတဲ့၊ငါ့ကိုယုံပါကွာတဲ့၊ငါတို့တရုတ်ဆေးတွေအကြောင်းငါပိုသိပါတယ်တဲ့။မင်းဒီဆေးကို(၁၀)လုံးမပြောပါနဲ့အလုံး(၂၀)သောက်ရင်တောင်မသေစေရပါဘူး၊ငါအာမခံပါတယ်တဲ့။

—

ကျွန်တော်ဘယ်လိုယုံကြည်လို့ရမှာလဲ၊ပြည်ကြီးသားတစ်ယောက်ကပါးစပ်နဲ့အာမခံပေးတာကိုယုံကြည်ပြီး၊ပုလင်းမှာနှစ်လုံးထက်ပိုရင်အန္တရာယ်ရှိပါတယ်လို့သေချာရေးထားတဲ့ဆေးကို(၁၀)လုံးလောက်တရုတ်ကြီးစကားကိုယုံပြီးသောက်ရလောက်အောင်တော့ကျွန်တော်မမိုက်ရဲသေးဘူးလေ။

—

ဒါနဲ့တာကောကိုကျွန်တော်ပြန်ပြောလိုက်တယ်ခင်ဗျားထမင်းစားသွားရင်ကျွန်တော်လဲခင်ဗျားနဲ့အတူလိုက်စားမယ်လို့။ကျွန်တော့်ဆေးပုလင်းပါယူလာခဲ့မယ်ကျွန်တော့်ပုလင်းထဲကနေခင်ဗျားအရင်ဆုံးသောက်ပြလို့ပြောလိုက်တော့။တာကောကအူလှိမ့်နေအောင်ရယ်ပါလေရော။ပြီးတော့တာကောက(အိုကေ)တဲ့နေ့လည်စာအတူတူသွားစားကြတာပေါ့လို့ပြန်ပြောပါတယ်။

—

နေ့လည်စာမစားခင်မှာတာကောကကျွန်တော့်ပုလင်းထဲကဆေး(၁၅)လုံးကိုကျွန်တော့်ရှေ့မှာအရင်သောက်ပြလိုက်တယ်။ပြီးတော့ပြောတယ်ကိုင်းကျေနပ်ပြီလားတဲ့၊မင်းလဲ(၁၀)လုံးသောက်လိုက်တော့တဲ့။ကျွန်တော်ကမသောက်သေးပါဘူး၊ခင်ဗျားဘာဖြစ်မလဲအရင်စောင့်ကြည့်ရဦးမယ်။ထမင်းစားပြီးမှပဲသောက်တော့မယ်လို့ပြောလိုက်တော့။ဒီတစ်ခါတော့တာကောရယ်တာသီးတောင်သီးကုန်တယ်။ကျွန်တော်ကလဲသူ့ရဲ့အခြေအနေကိုစောင့်ကြည့်ပြီးတော့ဘာမှမဖြစ်ဘူးဆိုတာသေချာတော့မှထမင်းစားအပြီးအလုပ်ဝင်ခါနီးမှာဆေး(10)လုံးလောက်ကောက်မျိုချလိုက်တယ်။

—

အဲဒီနေ့အလုပ်လုပ်ရတာအခုထက်ထိမှတ်မိနေလောက်အောင်ကိုတော်တော်ကောင်းပါတယ်။ ထမင်းအဆီရစ်အိပ်ငိုက်ပြီးလေးလံထိုင်းမိုင်းတာလုံးဝမရှိတော့ပဲနဲ့ပေါ့ပါးသွက်လက်စွာနဲ့အလုပ်ကောင်းကောင်းလုပ်နိုင်ခဲ့ပါတယ်။

—

နောက်နေ့မှာလဲတာကောနဲ့နေ့လည်စာအတူစားဖြစ်ပြီးစိတ်ဝင်စားလို့တရုတ်ပြည်ကဆေးတွေအကြောင်းမေးပြီးစပ်စုမိတော့တာပေါ့။တာကောလို့ကျွန်တော်ကမြန်မာပြည်ကလာတာဆိုတော့အမှန်အတိုင်းဝန်ခံရရင်တရုတ်ပြည်ကလာတဲ့ပစ္စည်းတွေဆိုရင်အရမ်းကိုလန့်နေပါတယ်လို့။အမေရိကန်ကကုမ္မဏီတွေကလဲတရုတ်ဆေးတွေကိုဝယ်ပြီးဗူးပြန်သွတ်တာဆိုတော့တကယ်လို့အဲဒီဆေးတွေသောက်လိုက်ရင်အန္တရာယ်မရှိနိုင်ဘူးလားလို့၊စိတ်မဆိုးပါနဲ့ဗျာလို့တစ်ကယ်ကိုမသိလို့စိုးရိမ်ပြီးမေးမိတာပါလိုပြောလိုက်တော့။

—

တာကောကအကြီးအကျယ်ကိုအူလှိမ့်ပြီးရယ်ပါလေရော၊ကျွန်တော့်ကိုမင်းကရယ်စရာဟာသတော်တော်ပြောတတ်တဲ့ကောင်ပဲတဲ့။မင်းမေးတဲ့မေးခွန်းတွေကကငါ့အတွက်တော့ဟာသတွေကြီးကြီးပဲတဲ့။ကျွန်တော်ကထပ်ပြီးနောက်နေတာမဟုတ်ဘူးအကိုလို့ကျွန်တော်တို့မြန်မာပြည်မှာကတရုတ်ပစ္စည်းတွေသုံးမိလို့အန္တရယ်ဖြစ်သွားတာတွေကြားဖူးနေလို့ပါလို့။လုပ်ဖော်ကိုက်ဖက်တွေမို့ညီအကိုအရင်းတွေလိုသဘောထားပြီး၊အမှန်အတိုင်းပြောပြပါဗျာလို့ပြောလိုက်တော့။

—

တာကောကပြောတယ်။မင်းကိုငါညီငယ်တယောက်လိုခင်မင်လို့အမှန်အတိုင်းပြောပြပါမယ်တဲ့။ငါတို့တရုတ်ပြည်ကြီးရဲ့ထွက်ကုန်ပမာဏ(70%)ကျော်လောက်ကိုအမေရိကန်တနိုင်ငံတည်းကပဲဒိုင်ခံဝယ်နေတာတဲ့။ငါတို့ဆီကဆေးဝါးတွေစားပြီးအမေရိကန်လူမျိုးတွေအန္တရာယ်ဖြစ်သွားအောင်တော့ငါတို့ဘယ်တော့မှမလုပ်ပါဘူးစိတ်ချတဲ့။ငါတို့တရုတ်တွေကကိုယ့်ထမင်းအိုးကိုပြန်ရိုက်ခွဲရလောက်အောင်တော့မမိုက်ကြဘူးတဲ့။အမေရိကန်မှာလုပ်တဲ့ဆေးတွေကိုသာသတိထားပြီးပုလင်းမှာရေးထားတဲ့အညွန်းအတိုင်းတိတိကျကျသောက်ပါတဲ့၊ငါမင်းကိုဂျင်ဆင်းဆေးသောက်ခိုင်းသလိုမျိုးတော့အမေရိကန်လုပ်ဆေးတွေကိုတော့သွားမသောက်မိစေနဲ့တဲ့၊ပိုသောက်မိရင်မင်းကောင်းကောင်းဒုက္ခဖြစ်သွားနိုင်တယ်တဲ့။အခုဒီ(ဂျင်ဆင်း)ဆေးကိုဆေးညွန်းမှာရေးထားတာထက်(၁၀)ဆလောက်ပိုသောက်လဲမင်းဘာမှမဖြစ်တာဟာတရုတ်ဆေးဖြစ်နေလို့ပဲတဲ့။ဒါကြောင့်ကမ္ဘာမှာအန္တရာယ်အကင်းဆုံးဆေးကငါတို့တရုတ်ဆေးတွေပဲတဲ့။

—

မင်းဂျင်ဆင်းဆေးတစ်လုံးသောက်တာဘာမှမထူးခြားပဲ(၁၀)လုံးသောက်မှအလုပ်စလုပ်တာတွေ့တယ်မဟုတ်လားတဲ့။ဂျင်ဆင်းဆိုတာကငါတို့တရုပ်ပြည်မှာကချီးပေါသေးပေါတဲ့။ဒါကြောင့်မို့နဲနဲပါးပါးဆေးတောင့်ထဲမှာထည့်ထားသေးတယ်တဲ့။တချို့ဆေးတွေဆိုရင်မင်းတပုလင်းလုံးသောက်လဲအန္တရာယ်ဖြစ်ချင်မှဖြစ်တာတဲ့။မင်းစိတ်ချပါတဲ့၊တရုတ်ဆေး(overdose)ဖြစ်လို့အမေရိကန်မှာသေသွားတဲ့လူတစ်ယောက်မှမကြားဖူးသေးဘူးတဲ့။စိတ်ချလက်ချသာသောက်တဲ့၊အမေရိကန်ကိုပို့လိုက်တဲ့တရုတ်ဆေးဆိုတာ၊ဘယ်တော့မှအန္တရာယ်မရှိနိုင်ပါဘူးတဲ့။

—

ကျွန်တော်ကလဲထပ်မေးမိလိုက်ပါတယ်။ဒါဆိုတရုတ်ဆေးတွေကဘာမှအန္တရာယ်မရှိတာတော့ဟုတ်ပါပြီ။ဘာမှအာနိသင်လဲမရှိဘူးဆိုတဲ့သဘောလားလို့မေးလိုက်တော့။သိပ်တော့မကြည်ဘူးပေါ့။ဘာပြန်ပြောလဲဆိုတော့၊ငါ့တို့တရုတ်တွေယုံကြည်ထားတာကတော့ဆေးတမျိုးအစွမ်းထက်တယ်မထက်ဘူးဆိုတာကဆေးစစ်တာမစစ်တာတခုတည်းနဲ့ဆိုင်တာမဟုတ်ဘူးတဲ့။ဆေးသောက်တဲ့သူရဲ့ဆေးအပေါ်ယုံကြည်နေမှု့ကလဲအရေးကြီးသေးတယ်တဲ့၊တရုတ်လိုဆိုရင်တော့်ယုံကြည်မှ့ု(စိယန်း)လို့ခေါ်တယ်တဲ့။

—

ဆေးသောက်မယ့်လူကဆေးအပေါ်ကောင်းတယ်လို့ယုံကြည်ပြီးသောက်လိုက်လို့၊ရောဂါသက်သာသွားတယ်ဆိုရင်ဒီဆေးရဲ့အာနိသင်ကတစ်ဝက်ပဲပါတယ်တဲ့၊တဝက်ကမိမိရဲ့စိတ်ကကောင်းမယ်လို့ယုံကြည်ထားတဲ့စိတ်စွမ်းအားတဲ့။ဆေးတခုကအာနိသင်ရှိတာမရှိတာထက်အဲဒီဆေးကိုယုံကြည်မ့ှုကလဲသောက်တဲ့လူအပေါ်အာနိသင်ဖြစ်လာစေပြီးအကျိုးပြုလာစေနိုင်တာပဲတဲ့။သူပြောလိုက်တာလဲမှန်နေတာပဲလေ။စိတ်ပညာအရဆိုရင်၊စိတ်ကယုံကြည်နေလို့အကျိုးသက်ရောက်မှု(placebo effect)ကိုသူဆိုလိုတာလို့ကျွန်တော်နားလည်လိုက်ပါတယ်။

—

ဒီပို့စ်ရဲ့ရှေ့ဆုံးမှာမေးထားတဲ့မေးခွန်းတွေက၊အခုတော့အဖြေထွက်သွားပါပြီ။တာကောပြောကြားချက်အရတရုတ်ပြည်မကြီးကလာပြီးတော့အမေရိကန်မှာဗူးပြန်သွတ်တဲ့(CAMP)ဖြည့်စွတ်စာဆေးတွေစားမိ၊သုံးမိရင်အဆိပ်အတောက်တွေ၊အန္တရာယ်တွေ၊ရေရှည်မှာရောဂါဆိုးကျိုးမျိုးတွေဖြစ်လာနိုင်မယ်လို့တော့ကျွန်တော်မထင်ပါဘူး။အရင်တုံးက(USA)ထင်ပြီးဝယ်ထားမိလိုက်တဲ့တရုတ်လုပ်ဆေးတွေကိုဆက်သောက်သင့်သလားမသောက်သင့်ဘူးလားလို့မေးရင်လဲဆက်သောက်နေလို့ရပါတယ်။သောက်တာနဲ့မသောက်တာနဲ့ကြားမှာဘာမှတော့ထူးထူးခြားခြားအကျိုးအမြတ်တော့မရှိနိုင်ပါဘူး။အန္တရာယ်နည်းသလိုအကျိုးအမြတ်အာနိသင်လဲနည်းပါတယ်၊ဘာကြောင့်လဲဆိုတော့အထဲမှာလိုအပ်တဲ့(Ingredients)တွေမှအပြည့်အဝမပါတာ။

—

ဥပမာပြောရရင် (Vitamin K2) ဆိုပြီးတော့ဆန်မုန့်၊ဂျုံမုန့်၊ပြောင်းဖူးမုန့်တွေပဲကြိတ်ထည့်ထားလိုက်ရင်တော့ဘယ်လိုအန္တရာယ်ဖြစ်နိုင်မှာလဲ။ဂျုံမုန့်တွေဆေးတောင့်ထဲထည့်ပြီးဆယ်လုံးလောက်သောက်လဲအန္တရာယ်မရှိနိုင်ပါဘူး။အန္တရာယ်မရှိသလိုအာနိသင်လဲမရှိပါဘူး။ယုံယုံကြည်ကြည်နဲ့တာကောပြောသလိုတရုတ်လို(စိယန်း)နဲ့သောက်ရင်တော့စိတ်တန်ခိုးကြောင့်နဲနဲပါးပါးလေးတော့အာနိသင်ရရှိနိုင်ပါတယ်။

—

တရုတ်ကလဲအမေရိကန်ကိုပ့ိုလိုက့်တဲ့ဆေးတွေထဲမှာသူတို့ထမင်းအိုးအကွဲခံပြီးတော့အဆိပ်အတောက်တွေထည့်မထားကြတာတော့သေချာပါတယ်။အမေရိကန်ကအရင်းရှင်ကုမ္မဏီကြီးတွေကလဲတရုတ်ဆေးတွေဗူးပြန်သွတ်ရောင်းရတာဟာအမေရိကန်ဆေးတွေထက်ပိုပြီးတော့လဲအန္တရာယ်လဲကင်းပါတယ်။ဈေးလဲပေါတယ်ဆိုတော့ပိုပြီးတော့အမြတ်လဲကျန်တာပေါ့။

—

ဆေးတစ်မျိုးကိုသောက်လိုက်လို့ဘာမှအကျိုးကျေးဇူးမရပါဘူးဆိုပြီးတော့ဆေးထုတ်တဲ့ကုမ္မဏီကိုတရားသွားစွဲလို့မှမရတာ။ဘယ်ဆေးကမှသောက်လိုက်ရင်ရောဂါချက်ချင်းပျောက်ပါမယ်လို့အာမခံပြီးရောင်းနေတာမှမဟုတ်တာ။သူ့ဆေးသောက်လိုက်လို့အဆိပ်ဖြစ်ပြီးသေသွားရင်တော့တရားစွဲလို့ရချင်ရနိုင်ပါတယ်။ဒါပေမဲ့လူတစ်ရာမှာတစ်ယောက်လောက်အဲဒီဆေးသောက်ပြီးသေသွားရင်တော့တခြားအကြောင်းတခုခုကြောင့်လဲသေနိုင်လို့တရာစွဲလို့မရနိုင်ပါဘူး။လူတစ်ရာသောက်လို့ငါးဆယ်ကျော်သေတယ်ဆိုရင်တော့တရားစွဲလို့ရနိုင်ပါတယ်။

—

ဒါပေမဲ့အမေရိကန်လိုအရင်းရှင်နိုင်ငံမှာကရှေ့နေကောင်းကောင်းကိုပိုက်ဆံပုံပေးပြီးငှားနိုင်မှတရားနိုင်တာပါ။မပိုင်ပဲနဲ့သွားလုပ်မိလို့ရှိစုမဲ့စုအိမ်လေးတွေတောင်အပေါင်ပေးလိုက်ရပြီး လမ်းဘေးရောက်သွားရတဲ့လူတွေမှအများကြီးပါ။အမေရိကန်ရှေ့နေဆိုတာကလဲသူ့ရှေ့မှာပိုက်ဆံပုံချထားပေးတော့မှစကားပြန်ပြောတဲ့လူမျိုးလေ၊အမေရိကန်ရှေ့နေဆိုတာစကားပြောဖို့မပြောပါနဲ့ကိုယ့်ရှေ့မှာချောင်းလေးတစ်ချက်လောက်ဟန့်ဖို့တောင်ပိုက်ဆံဒေါင့်စွန်း့လေးနဲ့ပါးစပ်ကိုကလော်ပြီ်းဖွင့်ပေးတော့မှအသံထွက်တဲ့လူမျိုးပါ။

—

ကိုယ်ဝယ်သောက်တဲ့ဖြည့်စွက်စာဆေးတွေကိုဓာတ်ခွဲခန်းမှာသွားစမ်းကြည့်လို့အထဲမှဆန်မုန့်၊ဂျုံမုန့်တွေ့ပဲပါတယ်ဆိုလဲဘာမှလုပ်လို့မရပါဘူး။(FDA)ကလဲဖြည့်စွတ်စာ(Supplement)ဆေးတွေကိုအားအားယားယားလိုက်စစ်မနေပါဘူး။(Supplement)တွေကို(USA-FDA)ကစကားထဲကိုထည့်မပြောတာပါ။(Drug)ဆိုရင်တော့နည်းနည်းတင်းကြပ်ပါတယ်။(Drug)တောင်မှအရည်အသွေးမပြည့်တာတွေအများကြီးပါ။

—

(Supplement)ဆေးတွေအရည်အသွေးမမှီတာလောက်ကတော့လက်တွေ့မှာတရားစွဲလို့မရနိုင်ပါဘူး၊ရှေ့နေခနဲ့မွဲရုံပဲရှိမှာပါ။ကုမ္မဏီကိုမကျေနပ်ဘူးသွားပြောရင်လဲကိုယ်ပေးထားတဲ့ဆေးဖိုးငွေကိုတော့အပြည့်ပြန်အမ်းလိုက်မှာပါပဲ။လက်တွေ့မှာဒီထက်ဘာမှပိုပြီးလုပ်လို့မရနိုင်ပါဘူး။အမေရိကန်ဆိုတာက၊တရားမျှတတဲ့ဒီမိုကရေစီနိုင်ငံလို့စာအုပ်ကြီးထဲမှာတော့သေချာရေးထားပေးပါတယ်။လက်တွေ့အပြင်မှာကျတော့အရှင်းရှင်အမြဲဗိုလ်ကျနေတဲ့အရင်းရှင်တို့ရဲ့နိုင်ငံတော်ကြီးပါ။မြန်မာတွေနားလည်အောင်ပြောရရင်တော့၊ခရိုနီကြီးတွေကြီးစိုးနေတဲ့နိုင်ငံပေါ့ဗျာ။

—

အမေရိကန်မှာက၊ဝယ်သူမကျေနပ်ရင်ပိုက်ဆံပြန်အမ်းပေးရတယ်ဆိုတာကလဲဆေးကုမ္မဏီကြီးတွေမှာပဲကျင့်သုံးးနေတဲ့စနစ်မှမဟုတ်တာ၊နေရာတိုင်းမှာဘာပစ္စည်းပဲဝယ်ဝယ်၊ဝယ်သူကမကျေနပ်လို့ကန့်သတ်ရက်အတွင်းမှာပစ္စည်းပြန်လာပေးရင်ပိုက်ဆံအပြည့်ပြန်အမ်းပေးရတယ်ဆိုတာ၊တနိုင်ငံလုံးမှာကျင့်သုံးနေတဲ့ပေါ်လစီပဲလေ၊အသစ်အဆန်းမှမဟုတ်တာ။

—

တာကောစကားအရဆိုရင်တော့အမေရိကန်ပြန်သွတ်၊တရုတ်ဆေး(CMAP)တွေကိုဆက်သောက်သုံးနေလို့ရပါတယ်။အန္တရာယ်မရှိနိုင်သလိုအာနိသင်လဲမရှိနိုင်ပါဘူး။တရုတ်ဆေးတွေအာနိသင်ရှိသလားလို့လာမေးရင်တော့၊ပြည်ကြီးက(တာကော)ပြောသလိုတရုတ်စကားနဲ့ပြောရရင်တော့(စိယန်း)ပါပဲ။အင်္ဂလိပ်လိုတော့(placebo effect)ပေါ့ဗျာ။

—

အထူးမှတ်ချက်။အန္တရာယ်မရှိနိုင်သလိုအာနိသင်လဲမရှိနိုင်ပါဘူးလို့ပြောနေတာက(CMAP)စီမက်ဆိုတဲ့(China Made American Packaging)ဆိုတဲ့အမေရိကန်ကုမ္မဏီတွေကနေတဆင့်ဝင်လာတဲ့တရုတ်ဆေးအမှန်အကန်တွေကိုဆိုလိုနေတာဖြစ်ပါတယ်။။မြန်မာပြည်ကိုတရုတ်နယ်စပ်ကနေခိုးသွင်းနေတဲ့ဆေးအတုအယောင်ကလုန်း(Clone)ဆေးတွေကိုဆိုလိုချင်နေတာမဟုတ်ပါဘူး။

—

မြန်မာပြည်မှာအမေရိကန်ကနာမည်ကြီးကုမ္မဏီဆေးတိုင်းအတု(Clone)တွေရှိနေနိုင်ပါတယ်။ကျွန်တော်ကိုယ်တိုင်လဲ၊အမေရိကန်တံဆိပ်(Probiotic)နှစ်မျိုးလောက်ကို(ကလုန်း)မိသွားဖူးပါတယ်။ကလုန်းမိသွားရင်တော့အလွန်အန္တရာယ်ရှိပါတယ်။တရုတ်ဆေးဆိုပေမဲ့(တာကော)ပြောသလိုဆေးညွန်းထက်ပိုမသောက်စေချင်ပါဘူး။ကိုယ်သောက်တဲ့ဆေးက(ကလုန်း)ဖြစ်နေရင်အသက်အန္တရာယ်တောင်ရှိနိုင်ပါတယ်။ကလုန်းနဲ့ဆေးအစစ်ဘယ်လိုမှခွဲခြား၍မရနိုင်ပါ။

—

တာကောနဲ့ကြုံခဲ့ရတဲ့အဖြစ်အပျက်ကကိုယ်တွေ့ပါ။ဒါပေမဲ့နှစ်ပေါင်းများစွာကြာပြီဆိုတော့၊အပြန်အလှန်ပြောခဲ့တဲ့စကားလုံးတွေကတော့(၏၊သည်)မရွှေးတိတိကျကျတော့မမှတ်မိနိုင်ပါဘူး။အချိန်ကြာသွားတဲ့အဖြစ်အပျက်လဲဖြစ်၊ပြန်ရေးတဲ့အခါမှာလဲစာဖတ်သူနားလည်အောင်ရေးရတယ်ဆိုတော့စကားလုံးအသုံးအနုန်းတွေကတော့နည်းနည်းပါးပါးလွဲချင်လွဲနိုင်ပါတယ်။ဒါပေမဲ့ဆိုလိုရင်းနဲ့သဘောတရားကတော့အတူတူပါပဲ။

Kelvin A Power